Mercados de Ribadeo
Praza de abastos
En pleno centro de Ribadeo, na Rúa Xosé Vicente Pérez Martínez, atópase un edificio emblemático da vila doado por D. Ramón González Fernández. Neste lugar celébrase o Mercado de Abastos de luns a sábado en horario de 8 a 15 horas. Aquí poderás atopar distinta variedade de produtos hortícolas, froitas, carnes, peixes e todo tipo de artigos de proximidade e calidade procedentes de pequenos/as produtores/as e recolectores/as locais.
Mercado dos domingos
Ribadeo mantén a súa histórica tradición comercial co Mercado dos Domingos. O Concello organiza, en colaboración coa Asociación de Produtores/as da Horta A Sucadoira, na Praza de Abastos un mercado local onde se pode atopar gran variedade de produtos da horta, queixo, embutidos, doces, conservas, pan…, potenciando o consumo da tempada e poñendo en valor a economía máis próxima. Trátase dun mercado de proximidade onde produtoras e produtores da zona achegan ás persoas consumidoras os seus produtos durante todos os domingos do verán, poñendo en valor a economía local e potenciando o consumo de tempada e saudable.
Mercado dos mércores
Todos os mércores do ano ten lugar na Praza de Abastos o Mercado dos Mércores, un mercado de produtos locais e de primeira calidade que a persoa consumidora pode adquirir directamente mercando á produtora e xerando economía local, adquirindo produtos máis frescos e saudables e garantindo unha economía máis xusta tanto para as persoas produtoras como para as compradoras.
Mercado de Nadal
No ano 2003 Ribadeo recuperou o Mercado de Nadal, un mercado moi vinculado aos produtos de tempada e agasallos, así como actividades para nenos/as e maiores. Celébrase na ponte da Constitución e está ubicado no Parque de San Francisco, lugar onde os/as artesáns e vendedores/as expoñen os seus produtos do campo e manufacturas.